ધોરણ 10 અને 12ની બોર્ડની પરીક્ષા વર્ષમાં બે વખત લેવામાં આવશે, પરંતુ વિદ્યાર્થીઓએ બંને વખત પરીક્ષા આપવી જરૂરી રહેશે નહીં. કેન્દ્રીય શિક્ષણ મંત્રી ધર્મેન્દ્ર પ્રધાને આ વાત કહી છે. તેમણે કહ્યું કે વિદ્યાર્થીઓ પોતે જ નક્કી કરશે કે તેઓએ બોર્ડની પરીક્ષા એક કે બે વાર આપવી છે. આ સિસ્ટમ બાળકોની સુવિધા માટે લાવવામાં આવી છે. જો કોઈ વિદ્યાર્થી બંને પરીક્ષાઓ માટે હાજર રહે છે, તો બંને પરીક્ષામાંથી તેના શ્રેષ્ઠ પરિણામ સ્કોર ગણવામાં આવશે. આ સાથે વિદ્યાર્થીઓને એક જ વર્ષમાં પરીક્ષા આપવા માટે બે તક મળશે. તે જ સમયે, જો કોઈ વિદ્યાર્થીને તેના પ્રદર્શન પર વિશ્વાસ હોય, તો તે માત્ર એક જ વાર પરીક્ષા આપી શકે છે.
ધર્મેન્દ્ર પ્રધાને કહ્યું કે વિદ્યાર્થીઓમાં તણાવ અને ડર ઓછો કરવા માટે વર્ષમાં બે વખત બોર્ડ લેવાનો નિર્ણય લેવામાં આવ્યો છે. આ વર્ષે ઓગસ્ટમાં, શિક્ષણ મંત્રાલયે નવા અભ્યાસક્રમ ફ્રેમવર્ક હેઠળ વર્ષમાં બે વાર બોર્ડ પરીક્ષાઓ યોજવાની જાહેરાત કરી હતી. પરીક્ષા પદ્ધતિમાં ફેરફાર કરવા અને વિદ્યાર્થીઓની પરીક્ષાઓ અભ્યાસક્રમ આધારિત રાખવા માટે આ માળખું લાવવામાં આવ્યું છે. આ અંગે ધર્મેન્દ્ર પ્રધાને કહ્યું કે નવા અભ્યાસક્રમ ફ્રેમવર્ક 2023ના અમલીકરણ બાદ તેમણે ઘણા વિદ્યાર્થીઓ સાથે વાતચીત કરી છે અને વિદ્યાર્થીઓ આ નીતિથી ખુશ છે. અમે 2024 થી વર્ષમાં બે વાર બોર્ડની પરીક્ષા લેવાનો પ્રયત્ન કરીશું.
