ચીકી અને પરંપરાગત મોહનથાળના પ્રસાદ વચ્ચેના વિવાદ વચ્ચે હવે પ્રખ્યાત તીર્થધામ અંબાજીના મોહનથાળના નમુના ફુડ ટેસ્ટમાં ફેઇલ નીકળતાં ભક્તોમાં રોષ ફેલાયો છે. ભક્તો આ ભેળસેળ પાછળ મોહનથાળ બંધ કરવાનું ષડયંત્ર જોઇ રહ્યા છે. ફુડ વિભાગે પ્રસાદના નમુના લેવાયા હતા જે ફેઇલ થયા છે. પ્રસાદ બનાવવા વપરાયેલું ઘી નબળી ગુણવત્તાનું હતું. પ્રસાદ પુરો પાડતી મોહીની કેટરર્સ સામે કાર્યવાહી કરવાનો નિર્ણય કર્યો છે.
અંબાજીના પ્રસાદમાં કરોડો લોકો આસ્થા ધરાવે છે તેટલી જ શ્રદ્ધાથી મોહનથાળનો પ્રસાદ લે છે. આ મોહનથાળનું સ્થાન જ્યારે ચીકીએ લેવાની વાત આવી ત્યારે લોકોએ ભારે વિરોધ દર્શાવ્યો હતો. લોકોની આસ્થાએ જોતજોતામાં જીત મેળવીને ફરી મોહનથાળનો પ્રસાદ શરૂ થયો પરંતુ લોકોને શંકા હતી કે મોહનથાળનો પ્રસાદ બંધ કરાવવા કાવાદાવા થઈ શકે છે. ચીકીના પ્રસાદને પ્રમોશન મળે એ માટે મોહનથાળનો ભોગ લેવાઈ શકે છે એવી આશંકા મોટાપાયે વ્યક્ત થઈ રહી હતી. સૈકાઓથી આરોગાતાં મોહનથાળમાં ભાગ્યે જ આવી હોય તેવી ક્ષતિ ખૂલી છે. ભેળસેળ ખુલતા જ લોકોની આસ્થા સાથે પણ ચેડા થયા હોવાનું બહાર આવી અને ભક્તોમાં જબરદસ્ત રોષ ફેલાયો છે.
મોહનથાળ તથા ચીક્કી બંને પ્રસાદી આપવાનો નિર્ણય લેવાયો હતો. હવે ફરી વખત મોહનથાળના પ્રસાદને લઈને વિવાદ સર્જાયો છે. ફુડ વિભાગે લીધેલા પ્રસાદના નમુના લેવાયા હતા જે ફેઇલ થયા છે. પ્રસાદ બનાવવા માટે જે ઘી વપરાતું હતું તે નબળી ગુણવત્તાનું નીકળ્યું છે. મોહીની કેટરર્સ કે જે આ પ્રસાદ પુરો પાડે છે તેની સામે કાર્યવાહી થશે. યાત્રાધામ અંબાજીમાં ભાદરવી પૂનમના મેળા અગાઉ પ્રસાદ બનાવવા વાપરવામાં આવેલા ઘીના સેમ્પલ મેળવાયા હતા. ફૂડ વિભાગે લીધેલા આ સેમ્પલ ફેઈલ જતાં ઘીના 180 જેટલા ડબ્બા જપ્ત કરવામાં આવ્યા છે.
મોહનથાળનો પ્રસાદ બંધ કરવા કે લોકોમાં એ પ્રસાદ પ્રત્યે સૂગ ઊભી થાય એ દિશામાં આ કાર્યવાહી હોવાની શંકા પણ વ્યાપક જોવા મળી છે. ફૂડ એન્ડ ડ્રગ્સ ડીપાર્ટમેન્ટે સેમ્પલ લીધા બાદ સમગ્ર જથ્થો સીલ કરી દેવાયો છે. ઘીના સેમ્પલ ફેલ થયા બાદ ફૂડ એન્ડ ડ્રગ્સ વિભાગે એજન્સી સામે કાયદેસરની કાર્યવાહી કરવાની જાહેરાત કરી હોવાનું અંબાજી મંદિર ટ્રસ્ટના સત્તાધિશોએ જણાવ્યું છે.
બીજીતરફ મોહાની કેટરર્સ મેનેજરે જણાવ્યા મુજબ, ભાદરવી પુનમ માટે 4600 ડબ્બા બનાસ ડેરીનું ઘી વાપર્યું હતું. જોકે ત્યારબાદ ઘીની અછત સર્જાતાં અમદાવાદના નીલકંઠ ટ્રેડર્સ પાસેથી ઘી ખરીદવામાં આવ્યું હતું. ઘીના ડબ્બા પર અમૂલનો માર્ક, અમૂલનો બેચ નંબર પણ છે. ટ્રસ્ટે નાણાંકીય ચૂકવણી બેંક મારફત કરી છે પરંતુ નીલકંઠ ટ્રેડર્સ પાસેથી આવેલા ઘીમાંથી કેટલો પ્રસાદ બન્યો તેની તેમને જાણ નથી. જોકે, આ વિવાદને પગલે શ્રદ્ધાળુઓમાં નારાજગી છે.