વડાપ્રધાન નરેન્દ્ર મોદીની અધ્યક્ષતામાં બુધવારે NDAની મહત્વની બેઠક યોજાઈ હતી. પીએમ આવાસ, 7 લોક કલ્યાણ માર્ગ પર આયોજિત બેઠકમાં ભાજપના રાષ્ટ્રીય અધ્યક્ષ જેપી નડ્ડા, કેન્દ્રીય ગૃહ પ્રધાન અમિત શાહ, બિહારના મુખ્યમંત્રી અને જેડીયુ નેતા નીતિશ કુમાર અને ટીડીપીના વડા ચંદ્રાબાબુ નાયડુ અને એનડીએના અન્ય સહયોગી પક્ષોના ઘણા નેતાઓ પણ હાજર રહ્યા હતા. .
એનડીએની બેઠકમાં હાજર તમામ પક્ષોના નેતાઓએ વડાપ્રધાન મોદીને જીત માટે અભિનંદન પાઠવ્યા હતા અને તેમના નેતૃત્વમાં વિશ્વાસ પણ વ્યક્ત કર્યો હતો. એનડીએના સાથી પક્ષોએ પીએમ મોદીને સમર્થનનો પત્ર સોંપ્યો છે.
એનડીએની બેઠકમાં એક વાત ધ્યાને લેવા જેવી હતી જ્યારે ચંદ્રાબાબુ નાયડુ અને નીતીશ કુમાર સાથે વાત કરવામાં આવી ત્યારે પીએમ મોદી જોરથી હસી પડ્યા અને આ બેઠકની સારી તસવીર હતી.
સૂત્રોના જણાવ્યા અનુસાર, NDA નેતાઓ રાષ્ટ્રપતિ દ્રૌપદી મુર્મુને મળશે અને નરેન્દ્ર મોદીના નેતૃત્વમાં ફરીથી સરકાર બનાવવાનો દાવો કરશે, એવું કહેવામાં આવી રહ્યું છે કે નવી NDA સરકારનો શપથ ગ્રહણ સમારોહ 8 જૂને યોજાઈ શકે છે.
આ પહેલા 7 જૂને બીજેપી સંસદીય દળની બેઠકમાં પાર્ટીના સાંસદો નરેન્દ્ર મોદીને પાર્ટીના સંસદીય દળના નેતા તરીકે પસંદ કરશે. આ પછી, NDAના તમામ સાંસદોની બેઠક થશે, જેમાં નરેન્દ્ર મોદીને NDA સંસદીય દળના નેતા તરીકે પસંદ કરવામાં આવશે. બીજા દિવસે 8મી જૂને નરેન્દ્ર મોદી સતત ત્રીજી વખત દેશના વડાપ્રધાન તરીકે શપથ લેશે.
આ પહેલા બુધવારે જ વડાપ્રધાન મોદીની અધ્યક્ષતામાં પીએમના નિવાસસ્થાને મળેલી કેન્દ્રીય કેબિનેટની બેઠકમાં વર્તમાન લોકસભા (17મી લોકસભા)ને ભંગ કરવાની ભલામણને મંજૂરી આપવામાં આવી હતી. પીએમ આવાસ પર કેબિનેટ અને મંત્રી પરિષદની બેઠક બાદ વડાપ્રધાન મોદી રાષ્ટ્રપતિ ભવન ગયા અને રાષ્ટ્રપતિ દ્રૌપદી મુર્મુને મળ્યા.
પીએમ મોદીએ તેમનું અને તેમની મંત્રી પરિષદનું રાજીનામું રાષ્ટ્રપતિને સુપરત કર્યું. રાષ્ટ્રપતિ મુર્મુએ પીએમ મોદીનું રાજીનામું સ્વીકારી લીધું છે અને નવી સરકાર ચાર્જ ન લે ત્યાં સુધી તેમને પદ પર રહેવા વિનંતી કરી છે.
