ગુજરાતમાં આરોગ્યને ધ્યાનમાં રાખીને દારૂ ખરીદવાની મંજૂરી આપતા લોકોની સંખ્યામાં ત્રણ વર્ષમાં 58 ટકાનો વધારો થયો છે.એક ડેટા અનુસાર, ગુજરાતમાં હવે 43,470 પરમિટ ધારકો છે, જે નવેમ્બર 2020 માં 27,452 દારૂ પરમિટ ધારકો હતા. મહાત્મા ગાંધી જ્યાં જન્મ્યા હતા તે રાજ્ય હોવાને કારણે, ગુજરાતમાં તેની રચના થઈ ત્યારથી જ દારૂના ઉત્પાદન, સંગ્રહ, વેચાણ અને વપરાશ પર પ્રતિબંધ છે.
વિદેશી નાગરિકો, અન્ય રાજ્યોના લોકોને દારૂ ખરીદવાની મંજૂરી
રાજ્યની વસ્તી આશરે 6.7 કરોડ હોવાનો અંદાજ છે. નશાબંધી વિભાગના એક વરિષ્ઠ અધિકારીએ જણાવ્યું હતું કે લોકોને આરોગ્યના કારણોસર દારૂ ખરીદવાની મંજૂરી આપવામાં આવી છે, વિદેશી નાગરિકો અને અન્ય રાજ્યોના લોકો સિવાય કે જેમને ગુજરાતની મુલાકાત દરમિયાન વધુમાં વધુ એક સપ્તાહ સુધી દારૂ ખરીદવાની છૂટ છે.માહિતી અનુસાર, અમદાવાદ જિલ્લો 13,456 દારૂની પરમિટ સાથે ટોચ પર છે, ત્યારબાદ સુરત (9,238), રાજકોટ (4,502), વડોદરા (2,743), જામનગર (2,039), ગાંધીનગર (1,851) અને પોરબંદર (1,700) છે.
ગુજરાતમાં 77 હોટલોને દારૂ વેચવા માટે લાઇસન્સ
અન્ય માહિતી અનુસાર, ગુજરાતમાં 77 હોટેલોને પરમિટ ધારકો તેમજ દેશના અન્ય ભાગો અથવા વિદેશમાંથી રાજ્યની મુલાકાતે આવતા લોકોને દારૂ વેચવા માટેનું લાઇસન્સ આપવામાં આવ્યું છે. વિભાગ દ્વારા વ્યક્તિઓને દારૂની પરમિટ ત્યારે જ આપવામાં આવે છે જ્યારે પ્રાદેશિક મેડિકલ બોર્ડ અરજદારના સ્વાસ્થ્ય માટે દારૂનું સેવન જરૂરી હોવાનું જાહેર કરતું પ્રમાણપત્ર જારી કરે છે.
ગુજરાતમાં ભલે દારૂબંધી હોય પણ કેટલાક નિયમોમાં જે તે વ્યક્તિને દારૂ પીવાની પરમિટ પણ આપવામાં આવે છે. જોકે દરેક વ્યક્તિને આ છૂટ મળતી નથી, પણ કેટલાક કિસ્સામાં નિયમોને આધારે છૂટ મળે છે.
ગુજરાતમાં વસતી વ્યક્તિ માટે પરમિટ માટેના કેટલાક નિયમો
અરજદાર વ્યક્તિની ઉંમર 40 વર્ષ હોવી જોઈએ.
દારૂની પરમિટ લેનાર વ્યક્તિની માસિક આવક રૂપિયા 25,000 કરતાં વધુ હોવી જોઈએ.
દારૂની પરમિટ માટેનું ફૉર્મ ક્યાંથી મળે?
દારૂની પરમિટ માટેનું ફૉર્મ (વિનામૂલ્યે) જે તે જિલ્લાની કચેરીમાંથી મળી શકશે.
પ્રોસેસ ફી (રૂપિયા 2000) અને આરોગ્ય તપાસણીની ફી (રૂપિયા 2000) નક્કી કરેલી છે.
પરમિટ મળ્યા બાદ વાર્ષિક ફી 2000 રૂપિયા પણ ભરવાના રહેશે.
દારૂની પરમિટ માટે અરજી કેવી રીતે કરવી?
જે વ્યક્તિએ દારૂની પરમિટ મેળવવી હોય એણે નશાબંધી અને આબકારી વિભાગના કેટલાક નિયમોનું પાલન કરવાનું રહે છે.
અરજદારે અરજીની સાથે પોતાના પરિવારિક તબીબનું પ્રમાણપત્ર આપવાનું રહેશે.
તેમજ પોતાની ઉંમરનો પુરાવો, રહેઠાણનો પુરાવો અને આવક દાખલો આપવાનો રહેશે.
આ સિવાય અરજદારને જે કંઈ સ્વાસ્થ્ય સંબંધી સમસ્યા હોય એ માટેની સારવાર, તેના પુરાવા, રિપોર્ટ વગેરે રજૂ કરવાના રહેશે.
પરમિટ મળ્યા બાદ પછી કેટલા પ્રમાણમાં દારૂ મળે એની પણ વિગતો આપવામાં આવેલી છે.
ઉંમરમાં 40 વર્ષથી વધુ અને 50 વર્ષ સુધીમાં દર મહિને 3 યુનિટ દારૂ મળે છે.
50 વર્ષથી વધુ અને 65 વર્ષ સુધીની ઉંમરમાં 4 યુનિટ.
65 વર્ષથી વધુ વયના અરજદારને 5 યુનિટ દારૂ મળે છે.
પરમિટની મુદત, નિયમોને અધીન એરિયા મેડિકલ બોર્ડ દ્વારા કરાયેલી ભલામણ સુધી રહે છે.
સંરક્ષણ દળના નિવૃત્ત કર્મચારી સિવાયની વ્યક્તિ માટે
એક યુનિટ એટલે કે 750 મિલીની સ્પિરિટની એક બૉટલ અથવા 750 મિલીની વાઇનની ત્રણ બૉટલ અથવા ઇથાઇલ આલ્કોહોલનું પ્રમાણ 2 ટકા કરતાં વધુ હોય તેવા ફૉર્મેન્ટેડ લિકરની 650 મિલીની 10 કે 500 મિલીની 13 બૉટલ કે 330 મિલીની 20 બૉટલ અથવા ઇથાઇલ આલ્કોહોલનું પ્રમાણ 2 ટકા કરતાં વધુ ન હોય તેવા ફૉર્મેન્ટેડ લિકરની 650 મિલીની 30 કે 750 મિલીની 27 બૉટલ મળી શકે છે.
સંરક્ષણ દળના નિવૃત્ત સભ્યો માટે
એક યુનિટ એટલે કે 750 મિલીની સ્પિરિટની એક બૉટલ અથવા 750 મિલીની વાઇનની બે બોટલ અથવા 375 મિલીની લિકરની બે બૉટલ અથવા બિયરની 4 બૉટલ મળી શકે છે.