મેટ્રિમોનિયલ સાઇટ્સ અને ડેટિંગ એપ દ્વારા યુવતીઓ અને ખાસ કરીને પરણીત મહિલાઓને ફસાવતી ગેંગ પોલીસને હાથ લાગી છે. અત્યાર સુધીમાં આ પ્રકારના ગુનામાં આ સૌથી મોટી સફળતા કહેવાઈ રહી છે. લગ્નની અને અન્ય લાલચ આપવાના બહાને અલગ-અલગ તરકટો રચીને તેઓ પૈસા પડાવતા હતા. અત્યાર સુધીની તપાસમાં ગુજરાત સહિત દેશભરમાંથી 80થી વધુ યુવતીઓ અને મહિલાઓ સાથે છેતરપિંડીનો મામલો સામે આવ્યો છે. આ ઉપરાંત વિદેશી મહિલાઓ સાથે પણ છેતરપિંડી કરવામાં આવી છે.
એક મહિલા સાથે 10 લાખ રૂપિયાની છેતરપિંડી કર્યા બાદ તપાસ શરૂ થઈ અને શોધખોળના અંતે આરોપીઓની દિલ્હીથી ધરપકડ કરવામાં આવી છે. તેના ખાતામાંથી લગભગ બે કરોડ રૂપિયા મળી આવ્યા છે. આરોપીઓમાં બે નાઈજીરિયન અને દિલ્હીનો એક યુવક સામેલ છે. તેમની પાસેથી એટીએમ કાર્ડ, લેપટોપ, 22 મોબાઈલ અને 58 સિમ મળી આવ્યા છે. તેમની પાસેથી મળેલા સિમમાં 31 વિદેશી છે.
ડીસીપી સેન્ટ્રલ પૂજા વશિષ્ઠે જણાવ્યું કે આરોપીઓમાં સી એન્થોની ઓબીઓરા, ઓબિન્ના યુજીન ઓર્લુમા અને એક ભારતીય આરોપી રાહુલ નારંગનો સમાવેશ થાય છે. આરોપી સી એન્થોની ઓબીઓરા અને ઓબિના યુજીન ઓર્લુમા નાઈજીરીયન છે, પરંતુ હાલ આરોપીઓ દિલ્હીના ઉત્તમ નગરમાં રહેતા હતા. આરોપીઓએ એક મહિલા પાસેથી લગ્નના બહાને મેટ્રિમોનિયલ સાઇટ પર 10 લાખ 52 હજાર રૂપિયાની છેતરપિંડી કરી હતી. મહિલા આરોપી અભત વર્માને મેટ્રિમોનિયલ સાઇટ પર મળી હતી. આરોપીએ પોતાને લંડનનો રહેવાસી ગણાવ્યો હતો. તેની સાથે મિત્રતા કરી અને તેને મળવા મુંબઈ આવવાની વાત કરી. થોડા સમય પછી આરોપીએ પીડિત મહિલાને ફોન કરીને કહ્યું કે તે 10 જાન્યુઆરીએ તને મળવા મુંબઈ આવી રહ્યો છે. તે પછી, બીજા દિવસે, આરોપીએ મહિલાને કસ્ટમ, ઇન્કમ ટેક્સ અને મની ટ્રાન્સફર ઓફિસર તરીકે દર્શાવીને વિવિધ નંબરો પરથી કોલ કર્યા. આરોપીએ જણાવ્યું હતું કે મુંબઈ એરપોર્ટ પર કસ્ટમ અધિકારીઓએ તેને પકડી લીધો હતો કારણ કે તે કેટલીક જ્વેલરી અને લંડનની કરન્સી લઈને જતો હતો. મહિલાને કહેવામાં આવ્યું કે જ્યાં સુધી તમે મને પાંચ લાખ રૂપિયા નહીં મોકલો ત્યાં સુધી તેને ક્લિયરન્સ નહીં મળે. સ્ત્રી તેની વાતમાં લાગી ગઈ. પાંચ લાખ લીધા બાદ પણ તેણે અલગ-અલગ બહાને પૈસા માંગ્યા અને કુલ 10 લાખ 52 હજાર રૂપિયા તેના ખાતામાં જમા કરાવ્યા. આ અંગે મહિલાને પોતાની સાથે છેતરપિંડી થઈ હોવાનું માલુમ પડતાં તેણે સાયબર ક્રાઈમ પોલીસ સ્ટેશનમાં ફરિયાદ નોંધાવી હતી.
14 માર્ચે પોલીસે છેતરપિંડી અને ષડયંત્રની કલમો હેઠળ રિપોર્ટ નોંધીને તપાસ શરૂ કરી હતી. ટેક્નોલોજીનો ઉપયોગ કરીને ટીમે આરોપીની દિલ્હીના તિલક વિહાર વિસ્તારમાંથી ધરપકડ કરી હતી. ત્રણેય આરોપીઓ ગ્રેજ્યુએટ હોવાનું તપાસમાં બહાર આવ્યું છે. આ લોકોએ બે મહિનામાં લગભગ બે કરોડ રૂપિયાની છેતરપિંડી કરી છે. અમુક રકમને બિટકોઈનમાં કન્વર્ટ કરીને નાઈજીરીયા મોકલવામાં આવી છે. આરોપીઓને પૂછપરછ માટે ચાર દિવસના પોલીસ રિમાન્ડ પર લેવામાં આવ્યા છે.
