સાત વખત પડો, આઠ વખત ઉઠો, આ જાપાની કહેવત નિષ્ફળતાને સફળતામાં ફેરવવાનો મંત્ર કહે છે. 2022ની ચૂંટણી માટે મોરબીથી કોંગ્રેસના ઉમેદવાર જયંતિ પટેલ છેલ્લા ત્રણ દાયકામાં યોજાયેલી વિધાનસભાની ચૂંટણીમાં પાંચ વખત આ બેઠક હારી ચૂક્યા છે. પરંતુ આ વખતે તેઓ ફરી એકવાર ભાજપના કાંતિલાલ અમૃતિયાને હરાવવા ચૂંટણી જંગમાં છે. મોરબીના કેબલ બ્રિજ અકસ્માત દરમિયાન લોકોને બચાવવા માટે અમૃતિયાએ મચ્છુ નદીમાં ઝંપલાવ્યું હોવાથી ભાજપ તેને હીરો તરીકે રજૂ કરી રહ્યું છે. તેનો વીડિયો સોશિયલ મીડિયા પર વાયરલ થયો હતો. 30 ઓક્ટોબરે બનેલી આ દુર્ઘટનામાં 135 લોકોએ જીવ ગુમાવ્યા હતા. જયંતિનું કહેવું છે કે લોકો ભાજપના હઠીલા વલણથી નારાજ છે. તેમણે જણાવ્યું કે મોરબી નગરપાલિકા દ્વારા હજુ સુધી મૃતકો માટે શોકસભાનું આયોજન કરવામાં આવ્યું નથી. અહીંની જનતાની ભાવનાઓને માન આપીને અમે કોઈ રેલીનું આયોજન કર્યું નથી. અમે ચુપચાપ મતદારો વચ્ચે ફરતા રહીએ છીએ, તેમની ખબર-અંતર પૂછીએ છીએ.
66 વર્ષીય જયંતિએ તેમની રાજકીય કારકિર્દીમાં અત્યાર સુધી ક્યારેય વિજયનો સ્વાદ ચાખ્યો નથી. તેમની રાજનીતિની કારકિર્દી વર્ષ 1990માં શરૂ થઈ હતી. તેમણે 1998, 2002, 2007માં ચૂંટણી લડી હતી અને તાજેતરમાં જ તેઓ 2020ની પેટાચૂંટણીમાં બ્રિજેશ મેરજા સામે હારી ગયા હતા. જેઓ કોંગ્રેસ છોડીને ભાજપમાં જોડાયા હતા. આ વખતે મેરજા મેદાનમાં નથી. પટેલ હવે જીત તરફ મંડ્યા છે અને આશા છે કે નારાજ સ્થાનિકો પરિવર્તન માટે મત આપશે.
પટેલની જેમ વધુ બે ઉમેદવારો એવા છે કે જેમણે ચૂંટણીમાં વારંવારની હારને પોતાના જુસ્સાને કચડી નાખવા ન દીધો. 68 વર્ષીય ભીખુસિંહ પરમારે એકપણ જીત વિના ચાર ચૂંટણી લડી છે અને પાંચમી વખત નસીબ અજમાવી રહ્યા છે. તેમણે સૌપ્રથમ 1995માં મોડાસા બેઠક પરથી અપક્ષ તરીકે ચૂંટણી લડી હતી અને 13,041 મત મેળવ્યા હતા, જે બીજેપી અને બીએસપીના ઉમેદવારો પાછળ ત્રીજા ક્રમે હતા. 2002 માં તેઓ ફરીથી અપક્ષ તરીકે ચૂંટણી લડ્યા અને 17,596 મતો સાથે ત્રીજા સ્થાને આવ્યા. 2007 માં, તેમણે BSP ઉમેદવાર તરીકે તેમની ત્રીજી ચૂંટણી લડી. પરંતુ તેમને માત્ર 7,696 વોટ મળ્યા. 2017 માં, તેમણે મોડાસાથી ચૂંટણી લડવા માટે ભાજપની ટિકિટ મેળવી અને સખત લડત આપી, 1,640 મતોથી હાર્યા. તેમને આ વખતે ફરી એકવાર ભાજપની ટિકિટ મળી છે.
તેઓ કહે છે કે હું પાટીદાર અને ઠાકોર સેનાના આંદોલનને કારણે 2017ની ચૂંટણી બહુ ઓછા માર્જિનથી હારી ગયો હતો. આ વખતે એવું કંઈ નથી અને મને ખાતરી છે કે હું જ જીતીશ.
સમુરાઇ જીતેન્દ્ર સોમાણી ચાર વખત વિધાનસભાની ચૂંટણી હારી ગયા હોવા છતાં આ વખતે તેમની પ્રથમ ચૂંટણી જીતવા માટે ઉત્સુક છે. તેઓ વાંકાનેર બેઠક પરથી ભાજપના ઉમેદવાર છે. તેઓ પ્રથમ વખત 1995માં અપક્ષ તરીકે બેઠક લડ્યા હતા અને INC ના ખુર્શીદ પીરઝાદા સામે 1,383 મતોથી હારી ગયા હતા. ત્યારપછીની ચૂંટણીઓમાં, ભાજપે તેમની પત્ની જ્યોત્સના સોમાણીને મેદાનમાં ઉતાર્યા, જેમણે 2002માં જીત મેળવી. પરંતુ 2007માં હારી ગયા. જીતેન્દ્ર સોમાણી ફરી 2012 અને 2017માં ચૂંટણી લડ્યા હતા. પરંતુ વિજયનો સ્વાદ ચાખ્યો ન હતો.
