ગુજરાત વિધાનસભા સામાન્ય ચૂંટણી-૨૦૨૨ની તૈયારીને અનુલક્ષીને કેન્દ્રીય ચૂંટણી પંચ દ્વારા સુરત, નવસારી, વલસાડ, તાપી, નર્મદા અને ડાંગ જિલ્લાઓની ચૂંટણીની તૈયારીઓની સર્વગ્રાહી સમીક્ષા કરવામાં આવી હતી.
સુરત સરકીટ હાઉસ ખાતે કેન્દ્રીય ચૂંટણી પંચના નાયબ ચૂંટણી કમિશનર હ્રિદેશ કુમાર, પ્રિન્સિપલ સેક્રેટરી એસ.બી.જોશી, ડાયરેક્ટર (એકસપેન્ડીચર) પંકજ શ્રીવાસ્તવ, અધિક મુખ્ય નિર્વાચન અધિકારી કુલદીપ આર્ય વગેરે અધિકારીઓએ ગુજરાત વિધાનસભા સામાન્ય ચૂંટણી-૨૦૨૨ અંગે તૈયારીઓની સમીક્ષા બેઠક યોજી હતી. વિધાનસભાની સામાન્ય ચૂંટણી સંદર્ભે વિવિધ પાસાંઓ અંગે વિસ્તૃત માહિતી ઉપસ્થિત સંબંધિત જિલ્લાઓના કલેકટર અને પોલીસ અધિક્ષકો દ્વારા રજુ કરાઇ હતી.
કેન્દ્રીય ચૂંટણી પંચના નાયબ ચૂંટણી કમિશનરશ્રી હ્રિદેશકુમારે મતદાન જાગૃતિ, સ્ટાફ મેનેજમેન્ટ, લોજિસ્ટીક મેનેજમેન્ટ, મોક પોલ નિદર્શન, સ્ટાફ મેનેજમેન્ટ, કાયદો અને વ્યવસ્થા, ડેમોસ્ટ્રેશન પર માર્ગદર્શન આપી તૈયારીઓની સમીક્ષા કરી હતી. તેમણે આદિવાસી વિસ્તારમાં વધુ મતદાન થાય તે માટે આદિવાસી સંસ્કૃતિની ઝાંખી કરાવતા ઈનોવેશન મતદાનમથકો ઉભા કરવા અંગે જરૂરી સુચનો કરવા સાથે વધુમાં અધિકારીઓને ચૂંટણીલક્ષી માર્ગદર્શન પુરું પાડ્યું હતું.
સુરત જિલ્લા ચૂંટણી અધિકારી અને જિલ્લા કલેકટર આયુષ ઓકે વિગતો આપતા જણાવ્યું હતું કે, સુરત જિલ્લાની ૧૬ વિધાનસભા વિસ્તારમાં ૧૦મી ઓકટોમ્બરની તારીખ સ્થિતિએ ૪૭,૩૯,૨૦૧ મતદારો નોંધાયા છે. તે પૈકી દિવ્યાંગ મતદારો ૨૩૮૫૯ તથા ૪૬૨૩ મતદાન મથકો છે. સુરત જિલ્લામાં વિશેષ અભિયાનના ભાગરૂપે ૧૧૨ મહિલાઓ દ્વારા સંચાલિત મહિલા મતદાન મથકો, ૧૬ વિધાનસભા દીઠ એક- એક દિવ્યાંગ મતદાન મથકો તથા એક-એક મોડેલ મતદાન મથકો ઉભા કરવામાં આવશે.
દક્ષિણ ગુજરાતના છ જિલ્લાઓના વિધાનસભા વિસ્તારો વિષે હાલની સ્થિતિએ જોઈએ તો, સુરત જિલ્લાની ૧૬ વિધાનસભા વિસ્તારમાં ૪૭,૩૯,૨૦૧ મતદારો તથા ૪૬૨૩ પોલિગ સ્ટેશનો, ૨૩૮૫૯ દિવ્યાંગ મતદારો તથા ૮૦ વર્ષથી વધુ વયના ૬૨૦૩૭ વયોવૃધ્ધ મતદારો નોંધાયેલા છે. નવસારી જિલ્લામાં ચાર વિધાનસભા વિસ્તારમાં ૧૦૭૮૨૬૦ મતદારો તથા ૧૧૪૭ પોલીંગ સ્ટેશન, ૧૧૧૧૩ દિવ્યાંગ મતદારો તથા ૮૦ વર્ષથી વધુ વયના ૨૩૮૬૨ મતદારો, વલસાડ જિલ્લાની ૫ વિધાનસભા વિસ્તારમાં ૧૩૨૬૫૯૨ મતદારો તથા ૧૩૯૨ પોલિંગ સ્ટેશન, ૯૬૨૩ દિવ્યાંગ મતદારો તથા ૮૦ વર્ષથી વધુ વયના ૨૭૧૦૬ મતદારો નોંધાયેલા છે.
નર્મદા જિલ્લામાં બે વિધાનસભા વિસ્તારમાં ૪૫૭૭૦૩ મતદારો તથા ૬૨૪ પોલીંગ સ્ટેશન, ૪૦૮૪ દિવ્યાંગ મતદારો તથા ૮૦ વર્ષથી વધુ વયના ૭૩૬૧ મતદારો જયારે તાપી જિલ્લામાં બે વિધાનસભા વિસ્તારમાં ૫૦૫૪૮૧ મતદારો તથા ૬૦૫ પોલીંગ સ્ટેશન, ૨૮૩૦ દિવ્યાંગ મતદારો તથા ૮૦ વર્ષથી વધુ વયના ૯૪૦૭ મતદારો છે. ડાંગની એક વિધાનસભા વિસ્તારમાં ૧૯૩૨૯૮ મતદારો તથા ૩૩૫ પોલીંગ સ્ટેશનો, ૧૧૫૮ દિવ્યાંગ મતદારો તેમજ ૮૦ વર્ષથી વધુ વયના ૧૬૩૬ મતદારો નોંધાયેલા છે. આમ છ જિલ્લાઓની ૩૦ વિધાનસભા વિસ્તારમાં ૮૩૦૦૫૩૫ મતદારો ૮૭૨૬ પોલીંગ સ્ટેશન, ૫૨૬૬૭ દિવ્યાંગ મતદારો તેમજ ૮૦ વર્ષથી વધુ વયના ૧૩૧૪૦૯ મતદારો નોંધાયેલા છે.
આજની બેઠકમાં શહેરના પોલીસ કમિશનર અજયકુમાર તોમર, સુરત, નવસારી, ડાંગ, તાપી, નર્મદા અને વલસાડ જિલ્લાઓના જિલ્લા ચૂંટણી અધિકારીઓ, પોલીસ અધિક્ષક, સુરત જિલ્લાના અધિક જિલ્લા ચૂંટણી અધિકારી કમલેશ રાઠોડ તેમજ નાયબ ચૂંટણી અધિકારીઓ ઉપસ્થિત હતા.