ગુજરાતભરમાં મેઘરાજા જોરદાર બેટીંગ કરી રહ્યાં છે. જો કે ગઈ કાલ બપોર પછી વરસાદનું જોર ઘટ્યું હોય તેમ લાગી રહ્યુ છે. જોકે, હવામાન વિભાગની આગાહી પ્રમાણે, કેટલાક વિસ્તારોમાં અત્યંત ભારે વરસાદની આગાહી આપી છે. તો આજે (26 જુલાઈ ) સવારે 10 વાગ્યા સુધીમાં ગુજરાતમાં ભારેથી અતિભારે વરસાદની શક્યતા દર્શાવવામાં આવી છે.
ચોમાસાના એક માસમાં જ દોઢ ગણો વરસાદ વરસી ગયો
રાજ્યમાં આજ સુધીમાં ઈંચમાં સૌથી વધારે વરસાદ તો વલસાડ જિલ્લામાં 56 ઈંચ અને નવસારી જિલ્લામાં 54 ઈંચ નોંધાયો છે પરંતુ, જે તે જિલ્લામાં ઈ.સ. 1994થી 2023 સુધીના 30 વર્ષમાં નોર્મલ વાર્ષિક સરેરાશ વરસાદ વરસતો હોય છે તે દ્રષ્ટિએ ગુજરાતમાં સૌથી વધુ, દેવભુમિ દ્વારકા જિલ્લામાં આખા ચોમાસામાં વરસાદ વરસે તેના કરતા ચોમાસાના એક માસમાં જ દોઢ ગણો વરસાદ વરસી ગયો છે! આ જિલ્લામાં સરેરાશ 769 મિ.મિ. (આશરે 31 ઈંચ) વરસાદ વરસે છે તે સામે આ વર્ષે આજ સુધીમાં 1090 મિ.મિ. એટલે કે આશરે 44 ઈંચ વરસાદ વરસી ગયો છે. એટલે કે મૌસમનો 142 ટકા વરસાદ પડી ગયો છે.
31 તાલુકાઓમાં સરેરાશ 40 ઈંચથી વધુ વરસાદ
સમગ્ર ગુજરાતમાં એક તરફ 31 તાલુકા એવા છે જ્યાં 40 ઈંચથી વધુ વરસાદ ચોમાસાના એક મહિનામાં જ વરસી ગયો છે જેમાં નવસારી અને વલસાડ જિલ્લાના તમામ 12 તાલુકા, સુરત જિલ્લાના બારડોલી, કામરેજ, મહુવા, પલાસણા, સુરત શહેર, ઉમરપાડા, તાપીનો દોલવન તાલુકો છે.
હજુ પોણા ભાગનું ચોમાસું બાકી
જ્યારે સૌરાષ્ટ્રમાં દેવભુમિ દ્વારકા જિ.ના દ્વારકા, કલ્યાણપુર,ખંભાળિયા, પોરબંદર તાલુકો, જુનાગઢ જિ.ના જુનાગઢ, જુનાગઢ શહેર, કેશોદ, માળિયા હાટીના, માણાવદર, માંગરોળ, મેંદરડા, વંથલી, વિસાવદર તાલુકામાં 40 ઈંચ કરતા પણ વધુ વરસાદ વરસ્યો છે. સૌરાષ્ટ્રમાં ઈંચમાં સૌથી વધારે વરસાદ વિસાવદરમાં 1538 મિમિ અર્થાત્ આશરે આશરે 62 ઈંચ અને વંથલીમાં 56 ઈંચ જ્યારે દ્વારકા અને કેશોદ તાલુકામાં પણ આજ સુધીમાં 53 ઈંચથી વધુ વરસાદ વરસી ગયો છે અને હજુ પોણા ભાગનું ચોમાસુ બાકી છે !
આ જગ્યાએ અત્યંત ભારે વરસાદની આગાહી
હાલમાં ગુજરાત રાજ્યમાં બે સિસ્ટમ સક્રિય છે, જેને કારણે હજુ આજે પણ દક્ષિણ ગુજરાત અને મધ્ય ગુજરાતના જિલ્લાઓમાં અત્યંત ભારે વરસાદ સાથે રેડ એલર્ટ જાહેર કરવામાં આવ્યું છે. એમાં એક ઓફ શોર ટ્રફ કે જે દક્ષિણ ગુજરાતથી લઈને ઉત્તર કેરળ સુધી લંબાયો છે. એને કારણે નવસારી, વલસાડ, દમણ, દાદરા અને નગર-હવેલીમાં અત્યંત ભારે વરસાદની આગાહી કરી છે.
દરિયાકાંઠે 35થી 45 કિમીની ઝડપે પવન ફૂંકાશે
હજુ પણ આગામી ચાર દિવસ ગુજરાતના દરિયાકાંઠે 35થી 45 કિમીની ઝડપે પવન ફૂંકાવાની સાથે વીજળીના ચમકારા સહિત હળવાથી ભારે વરસાદી ઝાપટાંની અસર રહેશે, જેને કારણે માછીમારોને દરિયો ન ખેડવા સૂચના આપવામાં આવી છે. ઉલ્લેખનીય છે કે આગામી 48 કલાક બાદ ગુજરાત રાજ્યમાં શિયર ઝોનની અસર હળવી થતાં દક્ષિણ ગુજરાતના ભાગોમાં વરસાદનું જોર ઘટે એવી સંભાવના છે.
હવામાન વિભાગની આગાહી પ્રમાણે, આજે અમરેલી, ભાવનગર દક્ષિણ ગુજરાતમાં સુરત, નવસારી, ભરૂચ,તાપી,નવસારી, ડાંગ, વલસાડ અને નર્મદામાં અત્યંત ભારે વરસાદની આગાહી છે. આ સાથે રેડ એલર્ટ આપવામાં આવ્યું છે. આ સાથે જ છોટા ઉદેપુર, અમદાવાદ, ગાંધીનગર, બોટાદ, દાહોદ, મહીસાગર, અરવલ્લી, સાબરકાંઠા, મહેસાણા, પંચમહાલ,ખેડા, ગીર સોમનાથ અને સુરેન્દ્રનગરમાં ઓરેન્જ એલર્ટ આપવામાં આવ્યું છે. અહીં અતિભારે વરસાદ વરસવાની શક્યતા છે.