પેટ્રોલ અને ડીઝલના ભાવને લઈને જે આશંકા વ્યક્ત કરવામાં આવી રહી હતી તે સાચી પડી રહી છે. ચૂંટણી બાદ 22 માર્ચથી બંને ઈંધણના ભાવમાં સતત વધારો થઈ રહ્યો છે. દેશભરના તમામ મોટા શહેરોમાં પેટ્રોલનો ભાવ 100 રૂપિયા પ્રતિ લીટરને પાર કરી ગયો છે.
પેટ્રોલ અને ડીઝલ ઉપરાંત વાહનોમાં વપરાતા CNGના ભાવમાં પણ બુધવારે 2.50 રૂપિયા પ્રતિ કિલોનો વધારો થયો છે. આ વધારા સાથે રાજધાની દિલ્હીમાં એક કિલો સીએનજીની કિંમત 66.61 રૂપિયા થઈ ગઈ છે. 1 એપ્રિલથી CNGના ભાવમાં પ્રતિ કિલો રૂ. 6.6નો વધારો થયો છે. નિષ્ણાતોના મતે આ વર્ષે CNG 11 રૂપિયા પ્રતિ કિલો મોંઘો થયો છે.
આ વર્ષે 14.2 કિલોના ગેસ સિલિન્ડર માટે ઘરેલુ એલપીજીના ભાવમાં 100 રૂપિયાનો વધારો થયો છે. છેલ્લી વખત 22 માર્ચે તેની કિંમતમાં 50 રૂપિયા પ્રતિ સિલિન્ડરનો વધારો કરવામાં આવ્યો હતો. આ સિવાય હોટલ અને રેસ્ટોરન્ટ જેવી કોમર્શિયલ સંસ્થાઓમાં ઉપયોગમાં લેવાતા એલપીજીની કિંમતમાં 1 એપ્રિલે 249.50 રૂપિયાનો વધારો કરવામાં આવ્યો હતો. હવે 19 કિલોના સિલિન્ડરની કિંમત 2,253 રૂપિયા થઈ ગઈ છે. આ વર્ષે કોમર્શિયલ એલપીજીની કિંમતમાં 254.5 રૂપિયાનો વધારો થયો છે.
ઓઈલ માર્કેટિંગ કંપનીઓએ બુધવારે ફરી એકવાર પેટ્રોલ અને ડીઝલના ભાવમાં 80 પૈસાનો વધારો કર્યો છે. જોકે આજે રાહત છે. છેલ્લા 17 દિવસમાં કિંમતોમાં આ 14મો વધારો છે. છેલ્લા 17 દિવસમાં કુલ 10 રૂપિયા પ્રતિ લિટર અથવા 10 ટકાથી વધુનો વધારો કરવામાં આવ્યો છે.
સરકારી ઓઈલ કંપનીઓ દ્વારા જારી કરાયેલ પ્રાઇસ નોટિફિકેશન મુજબ, દિલ્હીમાં પેટ્રોલની કિંમત હવે 105.41 રૂપિયા પ્રતિ લીટર થઈ ગઈ છે, જ્યારે ડીઝલની કિંમત 96.67 રૂપિયા પ્રતિ લીટર થઈ ગઈ છે. દેશભરમાં પેટ્રોલ અને ડીઝલના ભાવમાં વધારો કરવામાં આવ્યો છે, પરંતુ સ્થાનિક ટેક્સના આધારે તેમની કિંમતો દરેક રાજ્યમાં બદલાય છે.
દેશભરના તમામ મોટા શહેરોમાં પેટ્રોલનો ભાવ 100 રૂપિયા પ્રતિ લીટરને પાર કરી ગયો છે. મહારાષ્ટ્ર, આંધ્રપ્રદેશ, ઓડિશા, છત્તીસગઢ, તેલંગાણા, મધ્યપ્રદેશ, બિહાર, ઝારખંડ, તમિલનાડુ અને કેરળમાં ઘણી જગ્યાએ ડીઝલ 100 રૂપિયા પ્રતિ લીટરને પાર કરી ગયું છે. દેશમાં પેટ્રોલની સૌથી વધુ કિંમત મહારાષ્ટ્રના પરભણીમાં 123.46 રૂપિયા પ્રતિ લિટર છે, જ્યારે ડીઝલ આંધ્ર પ્રદેશના ચિત્તૂરમાં 107.61 રૂપિયા પ્રતિ લિટર છે.
