ભારતે ઈંગ્લેન્ડને 100 રનથી હરાવી વર્લ્ડ કપ 2023માં જીતનો છગ્ગો માર્યો. લો સ્કોરિંગ મેચમાં જસપ્રિત બુમરાહ અને મોહમ્મદ શમીની ઘાતક બોલિંગથી ઈંગ્લિશ બેટ્સમેનો પત્તાના મહેલની જેમ ખરી પડ્યા. અંગ્રેજ ટીમને ઘૂંટણિયે પડવા મજબૂર કર્યા હતા.
ચોગ્ગા અને છગ્ગાની રમઝટ બોલે તેવી હાઈ સ્કોર મેચ દર્શકોને પસંદ આવતી હોય છે એવું કશું જ ન હોવા છતાંય પ્રેક્ષકોનો અભૂતપૂર્વ પ્રેમ ભારતીય ટીમને મળ્યો. આ મેચમાં બીજી ઘણી બાબતો હતી જેણે લોકોનું ધ્યાન ખેંચ્યું હતું. લખનૌના એકાના સ્ટેડિયમની આ મેચમાં થયું એ દિલધડક હતું.
મેચ બાદ સ્ટેડિયમમાં લાઇટ શો દરમિયાન હજારો ચાહકો ‘વંદે માતરમ’ ગાતા જોવા મળ્યા હતા. આ નજારો જોવા જેવો હતો અને લાગણીઓ નિતરતો હતો. તેનો વીડિયો પણ સામે આવ્યો છે. ફેન્સે તેના ઘણા વીડિયો સોશિયલ મીડિયા પર શેર કર્યા છે. કેટલાકે આ દ્રશ્યોને રૂંવાટા ઊભા કરી દે તેવા ગણાવ્યા.
