કચ્છ જિલ્લાનાં માંડવી તાલુકાના બિદડા મુકામે ગુજરાત રાજ્ય સંસ્કૃત બોર્ડ – ગાંધીનગર તથા શ્રી કચ્છ યુવક સંઘના સંયુક્ત ઉપક્રમે સંભાષણશાલા નામનાં સંસ્કૃતવર્ગનો સમાપન કાર્યક્રમ સંપન્ન થયો. વિદ્યાર્થીઓ અહીંથી કડકડાટ સંસ્કૃત ભાષા પરનું પ્રભૂત્વ મેળવવા સાથે અનેક લાગણીસભર અને આત્મવિશ્વાસથી છલોછલ સંભારણા મેળવી ગયા.
![](https://gujaratbreaking.com/wp-content/uploads/2023/06/gujarat-sanskrit-board-gujarat-breaking-1024x870.jpg)
સાત દિવસીય સંભાષણશાલા સંસ્કૃત વર્ગમાં સમગ્ર ગુજરાતના વિવિધ જિલ્લાઓમાંથી પંચાવન જેટલા ભાઈ બહેનોએ ઉત્સાહથી ભાગ લીધો હતો. જાણીને ગર્વ થશે કે, આ આવાસીય વર્ગમાં ભાગ લીધેલા તમામ સહભાગીઓ ફક્ત સાત જ દિવસમાં કડકડાટ સંસ્કૃત બોલતા શીખી ગયા છે. પ્રસ્તુત વર્ગમાં ભારતીય શિક્ષક પ્રશિક્ષણ સંસ્થાન – ગાંધીનગર (IITE) નાં પ્રોફેસર ડૉ. ગોપાલ ઉપાધ્યાય, ડૉ. કેતનભાઈ ભટ્ટ, બિંદુબેન પંડ્યા તથા નીરવભાઈ જાની સહીતનાં તજજ્ઞોએ સેવા આપી હતી.
વર્ગનાં સમાપન કાર્યક્રમના અધ્યક્ષ તરીકે માંડવી વિધાનસભાના સંસ્કૃતપ્રેમી ધારાસભ્ય અનિરુદ્ધભાઈ દવે, ગુજરાત રાજ્ય સંસ્કૃત બોર્ડનાં અધ્યક્ષ જયશંકર રાવલ, ખાસ ફરજ પરનાં અધિકારી મહેશ મહેતા (સચિવ, સમગ્ર શિક્ષા), મદદનીશ અધિકારી દેવદત્તભાઈ પંડ્યા તથા અન્ય મહાનુભાવોની પ્રેરક ઉપસ્થિતી રહી.
મહત્વની વાત એ છે કે, આ સમાપન કાર્યક્રમ સંપૂર્ણ સંસ્કૃતભાષામાં પ્રસ્તુત થયો હતો. જેમાં સહભાગીઓ દ્વારા સંસ્કૃત ગરબા, સંસ્કૃત દેશભક્તિ ગીતો, સંસ્કૃત નાટક વગેરે જેવી સંસ્કૃતસભર પ્રસ્તુતિઓ થઇ હતી. આ વર્ગને સફળ બનાવવા માટે વિદ્યાભારતી સંલગ્ન માતુશ્રી નિર્મળાબેન રવજી છેડા માધ્યમિક શાળા પરિસરનાં પ્રધાનાચાર્ય કીર્તિભાઈ વડિયા, ટ્રસ્ટી પંકજભાઈ શાહ તથા વ્યવસ્થાપક હરેશભાઈ પટેલ સહિતના અનેક લોકોએ ભારે જહેમત ઉઠાવી હતી.