કાર્તિક આર્યન અને કિયારા અડવાણીની મોસ્ટ અવેટેડ ફિલ્મ ‘ભૂલ ભુલૈયા 2’ના ફેન્સ માટે સારા સમાચાર છે. લાંબા સમયથી આ હોરર કોમેડી જોવા માટે ઉત્સુક દર્શકો માટે નિર્માતાઓએ ફિલ્મને નવી રિલીઝ ડેટ પર થિયેટરોમાં રિલીઝ કરવાનું નક્કી કર્યું છે. નિર્માતાઓએ 20 મે 2022ના રોજ ‘ભૂલ ભુલૈયા 2’ રિલીઝ કરવાનું નક્કી કર્યું છે.
પહેલા એવા સમાચાર હતા કે ‘ભૂલ ભુલૈયા 2’ એ જ દિવસે સિનેમાઘરોમાં એન્ટ્રી લેશે જ્યારે બાહુબલી ડિરેક્ટર એસએસ રાજામૌલીની ફિલ્મ ‘RRR’ રિલીઝ થવાની હતી. બંને ફિલ્મો 25 માર્ચે રિલીઝ થવાની હતી. જોકે, હવે મેકર્સની જાહેરાત બાદ હવે એ વાત કન્ફર્મ થઈ ગઈ છે કે ‘ભૂલ ભુલૈયા 2’ અને ‘RRR’ સાથે કોઈ ટક્કર નહીં થાય. T-Series ની સત્તાવાર Instagram પોસ્ટમાં, ‘ભૂલ ભુલૈયા 2’ 20 મે 2022 ના રોજ સિનેમાઘરોમાં રિલીઝ થવાની જાહેરાત કરવામાં આવી છે.
અનીસ બઝમી દ્વારા દિગ્દર્શિત, ‘ભૂલ ભુલૈયા 2’માં તબ્બુ અને રાજપાલ યાદવ સાથે કાર્તિક પણ મુખ્ય ભૂમિકામાં છે. ભૂષણ કુમાર, મુરાદ ખેતાની અને ક્રિષ્ન કુમાર ફિલ્મનું નિર્માણ કરી રહ્યા છે. આ ફિલ્મ ગયા વર્ષે જુલાઈમાં રિલીઝ થવાની હતી, પરંતુ દેશમાં કોરોનાને કારણે ફિલ્મનું શૂટિંગ સમયસર પૂર્ણ થઈ શક્યું નહોતું, જેના કારણે ફિલ્મની રિલીઝ ડેટ મોકૂફ રાખવામાં આવી હતી. પરંતુ હવે આ ફિલ્મ આ વર્ષે 20મી મેના રોજ રિલીઝ થવાની છે.
ફિલ્મ ‘ભૂલ ભૂલૈયા 2’ વર્ષ 2007માં રિલીઝ થયેલી ‘ભૂલ ભુલૈયા’ની સિક્વલ છે, જેમાં અક્ષય કુમાર, વિદ્યા બાલન મુખ્ય ભૂમિકામાં હતા. અક્ષય કુમારની ફિલ્મ ‘ભૂલ ભુલૈયા’ મલયાલમ ફિલ્મની રિમેક હતી. ભુલ ભુલૈયાનું દિગ્દર્શન પ્રિયદર્શને કર્યું હતું. તે જ સમયે, ફિલ્મ ભૂલ ભૂલૈયા 2 ના નિર્દેશક અનીશ બઝમી છે.
