રાજકોટમાં આગામી તા. 25ના રોજ વડાપ્રધાનના હસ્તે એઇમ્સ અને ઝનાના હોસ્પિટલનો લોકાર્પણ કરાશે. તેમજ વડાપ્રધાનના હસ્તે અટલ સરોવર તેમજ સ્માર્ટ સિટીનું પણ લોકાર્પણ કરાશે. આરએમસીના સ્ટેન્ડિંગ કમિટીના ચેરમેનનાં જણાવ્યા મુજબ, અટલ સરોવર પ્રોજેક્ટની 10 ટકાથી વધુ કામગીરી બાકી હોવાથી તે પૂર્ણ કરવા તંત્ર દ્વારા કવાયત હાથ ધરવામાં આવી છે.
ગુજરાતની પ્રથમ AIIMS
રાજકોટ એઈમ્સ ગુજરાતની પ્રથમ અને એકમાત્ર એઈમ્સ હશે. 1195 કરોડના ખર્ચે 201 એકર જમીનમાં બનેલી આ હોસ્પિટલ છે. તેના 250 બેડના ઇન્ડોર યુનિટનું ઉદ્ઘાટન વડાપ્રધાન મોદી કરશે. આ સાથે વડાપ્રધાન મોદી 100 કરોડના ખર્ચે તૈયાર થયેલી 150 વર્ષ જૂની ઝનાના હોસ્પિટલની નવી 11 માળની ઇમારત પણ સમર્પિત કરશે. તેઓ 136 કરોડના ખર્ચે બનેલ અટલ સરોવરને પણ સમર્પિત કરે તેવી શક્યતા છે. જો કે પીએમ નરેન્દ્ર મોદીની મુલાકાત વિશે કોઈ સત્તાવાર વિગતો ઉપલબ્ધ નથી, એવું જાણવા મળ્યું છે કે આ મુલાકાતમાં જાહેર સભા અને રોડ શો સામેલ હોઈ શકે છે.
રાજકોટ એઈમ્સમાં હેલીપેડની સુવિધા છે જેનો ઉપયોગ એર એમ્બ્યુલન્સ સેવા માટે કરવામાં આવશે. 40 કિલોમીટરના વિસ્તારમાં 3 કિલો સુધીની દવાઓ સપ્લાય કરવા માટે ડ્રોન સેવા પણ શરૂ કરવામાં આવે તેવી શક્યતા છે.રાજકોટ એઈમ્સને ગુજરાતની પ્રથમ આધુનિક VDIRL-3 સુવિધાયુક્ત લેબોરેટરી મળી છે જે દર્દીઓને માત્ર તબીબી અહેવાલો જ નહીં પરંતુ સંશોધન પણ કરી શકે છે.એઈમ્સમાં કેન્સર, હાર્ટ વગેરેની સુપર સ્પેશિયાલિટી સારવાર ધીરે ધીરે શરૂ થશે.
રાજકોટ એઇમ્સનું આગામી 25 ફેબ્રુઆરીના રોજ વડાપ્રધાન નરેન્દ્ર મોદીના હસ્તે લોકાર્પણ થવાનું છે ત્યારે આ પહેલા એઇમ્સ દ્વારા અલગ-અલગ વિભાગોમાં અલગ-અલગ ગ્રુપની ભરતી પ્રક્રિયા હાથ ધરવામાં આવી છે. ગત જાન્યુઆરી મહિનાના અંતમાં કરાયેલ ભરતી પ્રક્રિયામાં લગભગ 12 જેટલા વિભાગોમાં જરૂરિયાત મુજબ ભરતી કરવામાં આવી રહી છે. જેમાં જુનિયર મેડિકલ રેકોર્ડ ઓફિસર, જુનિયર ઇલેક્ટ્રિકલ એન્જીનીયર, જુનિયર સિવિલ એન્જીનીયર, જુનિયર હિન્દી ટ્રાન્સલેટર, સિક્યોરિટી કમ ફાયર જમાદાર, યોગા ઇન્સ્ટ્રકટર, સ્પીચ થેરાપિસ્ટ, આસિસ્ટન્ટ લોન્ડરી સુપરવાઈઝર, ડેન્ટલ ટેક્નિશિયન, લાઇબ્રેરીયન ગ્રેડ 3, આસિસ્ટન્ટ સ્ટોર ઓફિસ સહિત વિભાગોમાં ભરતી કરવામાં આવી છે. આ ઉપરાંત ડિસેમ્બર-2023માં પણ કેટલાક વિભાગોમાં ભરતી પ્રક્રિયા હાથ ધરવામાં આવી હતી.
દર્દી માટે ખાસ રાજકોટ એઇમ્સ દ્વારા મોબાઈલ એપ્લિકેશન પણ રાખવામાં આવી છે, જેનું નામ એઇમ્સ રાજકોટ સ્વાસ્થ્ય એપ્લિકેશન છે જે એન્ડ્રોઇડ અને આઈફોન બંને યુઝર્સ માટે ઉપલબ્ધ છે. મોબાઈલ એપ્લિકેશન મારફત રજિસ્ટ્રેશન કરાવી બાદમાં ઓનલાઇન સમય મેળવી સારવાર કરાવવાની રહેશે. આ એપ્લિકેશન મારફત દર્દી પોતાનું રજીસ્ટ્રેશન કરાવી શકશે. ઉપરાંત આ એપ્લિકેશનમાંથી એઇમ્સ રાજકોટની સુવિધા તેમજ ડોક્ટર તેમજ મેનેજમેન્ટ વિશે માહિતી મેળવી શકશે. આ એપ્લિકેશનમાં દર્દી લેબ રિપોર્ટ, પ્રિસ્ક્રિપશન, લેબ ઈન્કવાયરી, અને OPD ઈન્કવાયરી સહિત માહિતી મેળવી શકશે.