ઓસ્ટ્રેલિયન પત્રકાર ચેંગ લેઈ યિર્ને એક હૃદયસ્પર્શી પત્ર લખ્યો છે, જે સોશિયલ મીડિયા પર વાયરલ થઈ રહ્યો છે. ચેંગ લેઈએ લખ્યું કે તે બાળકોને ખુબ યાદ કરે છે અને ખુલ્લા આકાશ નીચે તડકામાં બેસવા માંગે છે. ચેંગ લેઈ ચીની મૂળની ઓસ્ટ્રેલિયન પત્રકાર છે, જે ચીનમાં કેદ છે. ત્રણ વર્ષ પહેલાં તે રહસ્યમય સંજોગોમાં ગાયબ થઈ ગઈ હતી અને બાદમાં જાણવા મળ્યું હતું કે તે ચીનની જેલમાં બંધ છે.
ચેંગ લેઈએ તેના પાર્ટનર નિક કુલીને જેલમાંથી એક પત્ર લખ્યો છે, જે નિકે સોશિયલ મીડિયા પર પોસ્ટ કર્યો છે. ચેંગ લેઈનો આ પત્ર સોશિયલ મીડિયા પર વાયરલ થઈ રહ્યો છે. પત્રમાં ચેંગ લેઈએ લખ્યું છે કે મારા સેલમાં સૂર્યપ્રકાશ માત્ર બારીમાંથી જ આવે છે પરંતુ હું એક વર્ષમાં માત્ર 10 કલાક જ તડકામાં ઉભી રહી શકું છું. ચેંગ લેઈએ લખ્યું છે કે છેલ્લા ત્રણ વર્ષથી તેણે ઝાડ, ઝાડી કે સમુદ્ર કિનારો જોયો નથી. તેણે કહ્યું કે વર્ષમાં માત્ર એક જ વાર તેનો પલંગ ખુલ્લી હવામાં બહાર કાઢવામાં આવે છે. ચેંગે કહ્યું કે તે તેની બાળકીને યાદ કરે છે.
તમને જણાવી દઈએ કે વર્ષ 2020માં ચીનની સરકારે ચીનના સરકારી ટીવી CGTNના પૂર્વ એન્કર ચેંગ લેઈની અટકાયત કરી હતી. જોકે ચીનની સરકારે સત્તાવાર રીતે 2021થી ચેંગની ધરપકડ દર્શાવી છે. ચેંગ લેઈ પર ગુપ્ત માહિતી લીક કરવાનો આરોપ છે. જો કે, માહિતીને લઈને વધુ વિગતવાર માહિતી આપવામાં આવી નથી. ચેંગ લેઈની ધરપકડ એવા સમયે થઈ છે જ્યારે ચીન-ઓસ્ટ્રેલિયા સંબંધો ખરાબ તબક્કામાંથી પસાર થઈ રહ્યા છે. જો કે તાજેતરના સમયમાં બંને દેશો વચ્ચેના સંબંધોમાં થોડો સુધારો થયો છે, પરંતુ ચેંગ લેઈની મુક્તિ અંગે કોઈ પ્રગતિ થઈ નથી.
ઓસ્ટ્રેલિયાના વિદેશ મંત્રી પેની વોંગે કહ્યું કે આખો દેશ ઇચ્છે છે કે ચેંગ લેઈને મુક્ત કરવામાં આવે અને તેના બાળકોને પરત કરવામાં આવે. અમે ચેંગ અને તેના પરિવારને સમર્થન આપવાનું ચાલુ રાખીશું. વોંગે કહ્યું કે ગયા મહિને આસિયાન સમિટ દરમિયાન તેમણે ચીનના વિદેશ મંત્રી સમક્ષ ચેંગ લેઈની મુક્તિનો મુદ્દો ઉઠાવ્યો હતો.
