સફેદ કુર્તા-પાયજામા પહેરેલા છોકરાઓ કોમર્સ ફેકલ્ટી પાસે મંદિરની બહાર નમાઝ અદા કરતા જોવા મળે છે. ઘટના વડોદરાની એમએસ યુનિવર્સિટીની છે જ્યાંથી આ પહેલા પણ કેમ્પસમાં નમાઝ પઢવાના વીડિયો સામે આવ્યા છે. હિન્દુ સંગઠનો અને વિદ્યાર્થી નેતાઓએ આ ઘટના પર નારાજગી વ્યક્ત કરી છે, ત્યારે યુનિવર્સિટી પ્રશાસને તપાસની માંગ કરી છે. કેમ્પસમાં મહાદેવ મંદિરની બહાર સાંજે 4:45 વાગ્યે કેટલાક છોકરાઓએ નમાઝ અદા કરી હતી, જેને કોઈએ કેમેરામાં કેદ કરી લીધી હતી. વીડિયો સામે આવ્યા બાદ તેના પર ભારે હંગામો શરૂ થઈ ગયો. આ તમામ એક જ કેમ્પસના વિદ્યાર્થીઓ હોવાનું અને બી.કોમ.ના પ્રથમ વર્ષમાં અભ્યાસ કરતા હોવાની વિગતો સામે છે
વિદ્યાર્થી નેતા પંકજ જયસ્વાલે આ ઘટનાને ગંભીર ગણાવતાં જણાવ્યું કે આ કોઈ ચોક્કસ ષડયંત્રના ભાગરૂપે થયું હોઈ શકે છે. તેમણે કહ્યું કે નમાઝ પઢવી એ ખોટું નથી, પરંતુ મસ્જિદમાં જઈને કરો. તેમણે કહ્યું કે કેમ્પસમાં દરેક વ્યક્તિ અભ્યાસ કરવા આવે છે અને તેને આ રીતે વિવાદનું સ્થળ ન બનાવવું જોઈએ. તેમણે તપાસ કરી યોગ્ય કાર્યવાહીની માંગ કરી છે.
જણાવી દઈએ કે, આ પહેલા કેમ્પસના બોટની વિભાગમાં એક મુસ્લિમ વિદ્યાર્થી નમાઝ અદા કરતો જોવા મળ્યો હતો. અન્ય એક ઘટનામાં, યુનિવર્સિટી કેમ્પસમાં સંસ્કૃત મહાવિદ્યાલયના ગેટ પર એક યુવક અને યુવતી નમાઝ અદા કરતા હોવાનો વીડિયો સામે આવ્યો હતો.
હવે આ ઘટનામાં 3 વિદ્યાર્થી નમાઝ પઢતા હોવાનો વીડિયો વાયરલ થતાં ભારે હંગામો ઊભો થયો છે. વારંવારની આ ઘટનાઓ કેમ્પસમાં ચલાવી લેવાના મૂડમાં નથી તંત્ર કે નથી વિદ્યાર્થીઓ ત્યારે ભવિષ્યમાં આવી ઘટના હવે ન થાય એ માટે શું રણનીતિ ઘડાય છે એ જોવું રહ્યું. હાલ આ ઘટનામાં ઘેરા પ્રત્યાઘાત બહાર આવી રહ્યા છે.
એમએસ યુનિવર્સિટીના પીઆરઓ લકુલીશ ત્રિવેદીએ ઘટના અંગે ચિંતા વ્યક્ત કરતાં જણાવ્યું હતું કે એક સમિતિ તેની તપાસ કરશે અને વિદ્યાર્થીઓને બોલાવવામાં આવશે. આ ઘટનાની નિંદા કરતા, શિવસેનાના પ્રવક્તા દીપક પાલકરે ચિંતા વ્યક્ત કરી અને યુનિવર્સિટીના વાઇસ ચાન્સેલરની નિષ્ક્રિયતાનો આરોપ લગાવીને તેમની ટીકા કરી. તેમણે આ ઘટનામાં સંડોવાયેલા લોકો સામે કડક કાર્યવાહીની માંગ કરી હતી અને ભારપૂર્વક જણાવ્યું હતું કે આ પ્રકારની ત્રીજી ઘટના છે. પાલકરે કહ્યું કે પ્રવેશ સમયે વિદ્યાર્થીઓ પાસેથી લેખિતમાં લેવું જોઈએ કે જો તેઓ આવી પ્રવૃત્તિઓમાં સામેલ થશે તો તેમને તરત ઘર ભેગાં કરી દેવાશે.