ભારતીય ક્રિકેટ ટીમના યુવા બેટ્સમેન શુભમન ગિલ ટી20 ક્રિકેટમાં ટીમ ઈન્ડિયા માટે ઓપનિંગ કરવા માંગે છે. ગિલ હાલ ઝિમ્બાબ્વેના પ્રવાસે છે. ભારતીય ટીમ ગિલની કપ્તાનીમાં 5 મેચની T20 શ્રેણી રમવા માટે ઝિમ્બાબ્વે ગઈ છે. શ્રેણીની પ્રથમ ટી20 મેચ શનિવારે (6 જુલાઈ) હરારેમાં રમાશે. ભારતીય ટીમ પ્રથમ વખત વિરાટ કોહલી, રોહિત શર્મા અને રવિન્દ્ર જાડેજા વગર મેદાનમાં ઉતરશે. આ ત્રણેય ખેલાડીઓએ હાલમાં જ T20 આંતરરાષ્ટ્રીય ક્રિકેટને અલવિદા કહ્યું હતું. ગિલે કહ્યું કે રોહિત અને વિરાટની સિદ્ધિઓનું પુનરાવર્તન કરવું કોઈ પણ ખેલાડી માટે આસાન કામ નથી.
શુભમન ગિલ તાજેતરમાં સમાપ્ત થયેલા T20 વર્લ્ડ કપમાં ભારતની રિઝર્વ ટીમનો ભાગ હતો. તેણે ઝિમ્બાબ્વે (IND vs ZIM) સામે શરૂ થઈ રહેલી શ્રેણીની પ્રથમ T20 મેચની પૂર્વસંધ્યાએ કહ્યું, ‘મને લાગે છે કે રોહિત ભાઈ ઓપનિંગ બેટ્સમેન હતા. વિરાટ ભાઈએ આ વર્લ્ડ કપમાં પણ ઇનિંગ્સની શરૂઆત કરી હતી. મેં ટી-20માં પણ ઇનિંગ્સની શરૂઆત કરી છે. તેથી, મને લાગે છે કે હું ટી-20માં ઓપનિંગ બેટ્સમેનની ભૂમિકા ભજવવા માંગુ છું.
‘મારા પર દબાણ લાવવા નથી માગતો’
ગિલે કહ્યું કે તે કોહલી અને રોહિત જેવા બે મહાન ખેલાડીઓને મેચ કરવા વિશે વિચારીને દબાણને તેના પર હાવી થવા દેવા માંગતો નથી. રોહિત અને કોહલીની આ ફોર્મેટમાંથી નિવૃત્તિ પછી અપેક્ષાઓના દબાણનો સામનો કરવા વિશે પૂછવામાં આવતા ગિલે કહ્યું, ‘દબાણ અને અપેક્ષાઓ… મને લાગે છે કે તેઓ હંમેશા સાથે છે. વિરાટ ભાઈ અને રોહિત ભાઈએ જે હાંસલ કર્યું છે તે હાંસલ કરવાનો અથવા પહોંચવાનો જો હું પ્રયત્ન કરીશ, તો તે મારા માટે ખૂબ મુશ્કેલ હશે. દરેક ખેલાડીનું પોતાનું લક્ષ્ય હોય છે જ્યાં તે પહોંચવા માંગે છે. આ દબાણ છે. જો તમે બીજા જ્યાં પહોંચી ગયા છે ત્યાં પહોંચવા માંગો છો, તો તમારા પર વધુ દબાણ રહેશે.
ભારત અને ઝિમ્બાબ્વે વચ્ચેની પાંચેય મેચ હરારેમાં રમાશે
ભારત અને ઝિમ્બાબ્વેની ક્રિકેટ ટીમો શનિવારે હરારેમાં ટકરાશે. આ મેચ ભારતીય સમય અનુસાર સાંજે 4.30 વાગ્યાથી રમાશે. ટીમ ઈન્ડિયા છેલ્લા 8 વર્ષથી ઝિમ્બાબ્વે સામે હાર્યું નથી. ઝિમ્બાબ્વે ટીમની કપ્તાની 38 વર્ષીય સિકંદર રઝા કરશે.
